1Ti 3 | NAS | STEP | Enang Kumponing bakanamuiaang otoꞌnaꞌ naurama aung kara masikung nauramaꞌnaang: Tee naning dootuuꞌnupoong tanata-koo piavora tee, tampara nko-nko nkovuuꞌnaang tee piavoi otong.

1 Timothy 3

Dootuuꞌ Tanatanuka Otoroaing

1 Enang Kumponing bakanamuiaang otoꞌnaꞌ naurama aung kara masikung nauramaꞌnaang: Tee naning dootuuꞌnupoong tanata-koo piavora tee, tampara nko-nko nkovuuꞌnaang tee piavoi otong. 2 Naning teeꞌ nko-koo piavoko deekoꞌ tutung aung tanatanung aarumo paaraverira tauraꞌperiaing aaꞌnomaung deekoꞌ: 3 Tuumpiaa-peuꞌnaꞌ otoaꞌ, nani baꞌung-pinaꞌ otomaung, naikuma deekoꞌ naikuma basiaramanooꞌka bakearamaung, onou sirakaꞌpari otomaung, ovontung-pinaꞌ kaꞌduuroꞌ, naning navunavuroꞌ, sirakaꞌpui nau-anta-nko, purintoꞌnaruꞌke kanuꞌaravaung, daꞌdeng iira deeaung teka banainge otoꞌ, eeꞌnoko tataꞌaravaꞌ okoꞌoko deeaung. 4 Baurukaaꞌ bautaranuka tampaꞌ toosi-antavuri otomaung, toireꞌ tampaꞌ tarevuriko tampaꞌ meumpaamaung, tampaꞌ noruꞌai ookara kapooꞌkoo. 5 Aiꞌ naning tee baurukaaꞌ tampaꞌ tarevuriarura dei Kumponing bakaning dootuuꞌ nupoong arekeeꞌ tarevuripeuꞌ? 6 Eeꞌnoko tee naning aꞌmung bereꞌarieenung makosi deeaꞌ dootuuꞌnupoong tare-koo. Baka daangamparara duaꞌaraꞌneenga, Sietaniꞌ kiimata-numpoꞌ deempari duaꞌaruꞌnaꞌ baka daangamparakotaaꞌ. 7 Eeꞌnoko napoꞌ tee, tee naning ookarai tampaꞌ noruꞌaamaung makosi, Juꞌdeeainge. Tampaꞌ noruꞌaavaruko maiaꞌoi Sietaniꞌnung baankaꞌkoo taaviꞌarara duaꞌaraꞌneeng.

Dootuuꞌkoo Pakupakunuka Otoroaing

8 Enang napoꞌ tee Kumponing bakanamuiaang pakupaku-nupoong teeꞌ nariꞌke, paaraverima tauraꞌperiaing temuriiꞌ nko-nko nko-koo, aaꞌnomaing deekoꞌ: 9 Biikaang nko-nko masikaꞌantavaamaing, meneng paakanuka deeaꞌ, purintoꞌnaruꞌkoo baruꞌ keiꞌoroaing, okoꞌokonuka deeaing, eeꞌnoko tee masikung kara Kumponinge siraꞌmemuruꞌnung masikaꞌantavaamaing domang kiiroraaꞌoroi. 10 Tutung baakeeneverereriaꞌ tauraꞌperereriaukaꞌ. Tuumpi otoroaing-pinaꞌ oovererima deekoꞌ, pakupaku-nupoong deempariiꞌnaang makosi-antaverereriaing. 11 Manikuꞌ, biiꞌankaampi deekoꞌ aiꞌ pakupaku nkonuka deekoꞌ, napoꞌ teeꞌke, biikaang nko-nko masikaꞌantavai otoroaing, miring orari-antananka deeaꞌ, naiaama deekoro-antavariaing, kakeꞌii-nupoong ookara kapooꞌkoo. 12 Pakupaku nkonuka kemaimpariaukaꞌ. Biurukaaꞌ tampaꞌ tareaarimaatoai eeꞌnoko biikaning bautarananka naroꞌka. 13 Aiꞌ pakupaku-nupoong biikaang nko-nko tampaꞌ dupeaavaining teing nantoonge masikaꞌantavaariaining, eeꞌnoko maiaꞌoroaꞌ nantoong nauaaripeuꞌning tee kara Jiisuuꞌ Karistooꞌkoong masikaꞌantavaamanaꞌ.

Okoraꞌnung Kara Kumponing-nung Aarumo-koo

14 Dueꞌka diiꞌanko mooꞌnaang noruꞌamaang, nka aing botonanka daariamang daꞌdeng moaruko deekoꞌ tee aung noruꞌeriainaꞌ arekeeꞌ otoripeuꞌnaꞌ makosinaꞌ Kumponing-namuiaang-kooning deentariri. 15 Kumponing bakanamuiaang dootuuꞌnupoong teing eeꞌning Kumponing Domantooꞌ bakanavitu. Eeꞌnoko eeꞌnavitue tee kara masikung Kumponing-etaing deto kompai otomaung natukue bakatutai pava kompui otopeuꞌnaꞌ. 16 Eeꞌ, masikaꞌ tee minkunaa Kumponinge dooremuruꞌnung bakanamuiaang oꞌnoriainaꞌ naumurima, pankaing doorenang masikung, naninge daang-antavuarupeuꞌ. Okoraꞌnooꞌ tee Karistooꞌ,

Eeꞌnara niiꞌkoong naning deempari
mono ninka tavoꞌarama siraꞌparuꞌ;
Nantoonge tuumpiaako Tanuaang Meekunge tee
naning koontoꞌ masikee-antavukoꞌ;
Koosinunankai ooaakoꞌ;
Bakaninge daankiaakoꞌ
ookara nantoong-koo;
Nantoonge kansiꞌkoo otoroi
masikaꞌantavaakoꞌnunge;
Eeꞌnoko Kumponinge meenasi-koo
deto nkavuuꞌ.